Nyu-Yorkda fələstinli müqavimətçi qıza dəstək nümayişi keçirildi - Foto

Eastnews.org-un verdiyi xəbərə görə, ABŞ-ın Nyu-York şəhərindəki Penn Dəmiryol Stansiyasında toplaşan yüzlərlə amerikalı müsəlman İsrail rejiminin həbsdə saxladığı fələstinli Əhəd Təmimiyə dəstək nümayişi keçirib.

"Əhəd Təmimi sərbəst buraxılsın", "ABŞ, İsrailə yardımları kəs" və "Qüds Fələstinin paytaxtıdır" plakatları daşıyan nümayişçilər ABŞ və İsrail rejimi rəhbərlikləri əleyhinə şüarlar səsləndiriblər. Digər dinlərə mənsub insanların və xüsusən sionizm əleyhdarı yəhudi qrupların da iştirak etdiyi Təmimiyə dəstək nümayişi "Təmimiyə azadlıq" və "Fələstinə azadlıq" şüarları altında insidentsiz başa çatıb.

Aksiyanın təşkilatçıları tərəfindən paylanan mətbuat bəyanatında isə İsrailin Təmimini 2017-ci ilin 19 dekabrından bəri qanunsuz şəkildə həbsdə saxladığı vurğulanıb və Təmiminin ailəsindən daha öncə İsrail rejimi əsgərləri tərəfindən vurulan şəxslərlə bağlı məlumatlara yer verilib. 

ABŞ-da yaşayan müsəlmanların və digər dinlərə mənsub insanların hərəkətə keçməsi üçün müraciət edilən bəyanatda hər kəsin əlaqədar şəxslər, İsrailin Vaşinqtondakı səfirliyi ilə Nyu-Yorkdakı baş konsulluğuna əlaqə yaratması üçün hərəkətə keçməli olduğu bildirilib.