Məmur nəvəsinin avtomobili ilə törədilən qəzanın detalları üzə çıxdı - Video

Ötən gün Bakının Nərimanov rayonu ərazisində, Heydər Əliyev prospektində baş verən avtoqəzada iki nəfər ölüb, iki nəfər isə ağır yaralanıb. Bu barədə hüquq-mühafizə orqanları tərəfindən məlumat verilib.

"Mercedes Gelandewagen" markalı avtomobil piyadanı vuraraq maneəyə çırpılıb. Nəticədə maşın yanıb.

Ölənlər "Mercedes Gelandewagen" markalı avtomobilin sürücüsü, 1986-cı il təvəllüdlü Mehdi Əliyev və piyada, 1943-cü il təvəllüdlü Vaqif Əsədov olub. Hadisə zamanı yaralananlar Türkiyə vətəndaşları Mütəllib Tekiş və Songül Tekişdir. Onlar xəstəxanadadırlar.

İlkin məlumatlara görə, avtomobilin sahibi Qaçqınların və Məcburi Köçkünlərin İşləri üzrə Dövlət Komitəsinin sədri, Baş nazirin müavini Əli Həsənovun nəvəsidir. Yol-nəqliyyat hadisəsi baş verən zaman sükan arxasında ailənin sürücüsü olub. Faktla bağlı AR Cinayət Məcəlləsinin 263.3 maddəsi (ehtiyatsızlıqdan iki və daha artıq şəxsin ölümünə səbəb olan yol hərəkəti qaydasının pozulması) ilə cinayət işi qaldırılıb.

Bu arada, sözügedən yol-nəqliyyat hadisəsinin səbəbləri məlum olub. Bakı şəhər Dövlət Yol Polisi İdarəsinin (BŞDYPİ) İctimai qurumlarla əlaqə bölməsinin rəisi Vaqif Əsədovun bildirdiyinə görə, Azərbaycan Dövlət Rəssamlıq Akademiyasının yanında "Mercedes Gelandewagen"-in sürücüsü qarşıdakı maşına dəyərək idarəetməni itirib və yol qırağında dayanan 3 piyadanı vurub. Piyadalardan biri ölüb, üçü isə yaralanıb.

Ehtimala görə, sürücü avtomobili yüksək sürətlə idarə edib və qarşıdakı maşınla ara məsafəsi saxlamayıb. Faktla bağlı Nərimanov rayon Polis İdarəsində araşdırma aparılır.

Qəza zamanı xəsarət alan Türkiyə vətəndaşları Mütəllib Tekiş və Songül Tekiş ər-arvaddırlar və onlar, bəzi KİV-lərdə bildirildiyi kimi, hadisə zamanı piyada keçidinin üzərində deyil, qəza törədən "Mercedes Gelandewagen"-in içərisində olublar.