BDU - nun tələbəsi barədə ilkin məhkəmə qərarı qüvvədə saxlanıldı - Video

Yanvarın 5-də Bakı Apellyasiya Məhkəməsində hakim Həsən Əhmədovun sədrliyi ilə BDU-nun ilahiyyat fakültəsinin 4-cü kurs tələbəsi Zəka Mirağayevin CM-nin 147-ci maddəsi (böhtan) ilə məhkum olunmasına dair verilən apellyasiya şikayətinə əsasən məhkəmə prosesi keçirilib.
Vəkil E. Sadıqov çıxış edərək, Z. Mirağayevə bəraət verilməsini məhkəmədən istəyib. Qarşı tərəfin hüquqlarını müdafiə edən vəkil Kamandar Nəsibov isə Mirağayevin cəzasının ağırlaşdırılaraq, onun həbs olunmasını istəyib. Qısa sürən müşavirədən sonra hakim H. Əhmədov ilkin instansiya məhkəməsinin qərarının qüvvədə saxlanıldığını elan edib.
Qeyd edək ki, N.İsmayılzadə BDU-nin İlahiyyat fakültəsinin dekan müavinidir. Fakültənin 4-cü kurs tələbəsi Z.Mirağayev müsahibəsində dekan müavininin tələbələrdən rüşvət aldığını deyib. Bundan sonra N.İsmayılzadə xüsusi ittiham qaydasında şikayət verərək, məhkəməyə müraciət edib. O, Z.Mirağayevin CM-nin 147.2 (böhtan, ağır və ya xüsusilə ağır cinayətdə ittiham etməklə böhtan atma) CM-nin 148 (təhqir) maddələri ilə məsuliyyətə cəlb edilməsini istəyir. İyulun 10-da Yasamal rayon Məhkəməsi Mirağayevin axtarışa verilməsi barədə qərar çıxarıb. Qərarın icrası Yasamal Rayon Polis İdarəsinə həvalə olunub. Zəka Mirağayev tapılıb gətirilənə qədər məhkəmədə bu işin icraatı dayandırılıb. Zəka Mirağayev ötən məhkəmə iclasından sonra mətbuata bildirmişdi ki, məhkəmənin BDU rəhbərliyinin təzyiqi altında ədalətsiz qərar çıxaracağına və doğruları dilə gətirdiyinə görə həbs olunacağına əmin olduğundan ölkəni tərk edib. Oktyabrın 23-də Zəka Mirağayev Gürcüstandan Bakıya qayıdarkən aeroportda saxlanılıb və polisə təhvil verilib. Bir müddət sonra isə buraxılıb. 8 noyabr 2017-ci il tarixində Yasamal rayon Məhkəməsi CM-nin 148-ci maddəsinə (təhqir) dair şikayət üzrə cinayət işi üzrə icraata xitam verib və CM-nin 147-ci maddə (böhtan) ilə hökm elan edərək, Z. Mirağayevin qazancının 15 faizini dövlət hesabına ödəmək şərtilə islah işlərinə məhkum edilməsi barədə hökm çıxarıb.